ابني بيكدب ليه؟
ماحدش بيحب يشوف ابنه بيكدب، بس قبل مانفكر هنتصرف ازاي لازم الأول نعرف ايه السبب.
سن الطفل ليه علاقة كبيرة بالسبب.
الطفل الأصغر من ٤ سنين لسه مابيعرفش يفرق بين الحقيقة والخيال.
يعني لما يقولك ان فيه تعبان تحت السرير هو بيكون فعلا متخيل انه موجود مش بيكدب.
من ٤ - ٦ سنين
الطفل بيتمنى حاجات وبيحققها بالطريقة دي. يعني ممكن يقول ان اخته الكبيرة هي اللي اديته اللعبة بتاعتها لانه نفسه ده يحصل.
في السن ده كمان بيبدأ يكذب عشان يخلي اهله او مدرسته يحبوه.
ووممكن كمان يبدأ يكذب خوفا من العقاب، لو كان بيتعاقب في السن ده.
كل ما الطفل بيكبر الأسباب بتبقى معقدة أكتر.
خايف من عقاب او عايز يعمل حاجة المفروض مايعملهاش، مثلا يدخل اوضته بدل ماينام يلعب بالموبايل ويعمل نفسه نايم في السرير.
المراهق ممكن يكذب عشان يحافظ على خصوصيته ويحس ان حياته هو اللي مسيطر عليها مش حد تاني. ممكن يكذب عشان يريح نفسه من المناقشة والحوارات الكتير.
مش معنى ان معظم الاطفال بتكذب وانها حاجه ليها علاقة بنمو الطفل واكتشافه للحياة، مش معناه اننا نسيبه ونستنى لما يعدي المرحلة دي. فيه حاجات الام ممكن تعملها طبعا.
١. ابدأي من بدري.
في السن الصغير شجعي الطفل حتى لما يغلط. ماتحاوليش تعملي حاجه بداله عشان "هو مش عارف". سيبيه يحاول ويغلط وشجعيه اكتر.
لما يشوفك ماعندكيش مشكله انه يغلط وبتشجعيه انه يصلح الغلط ويحاول تاني، مش هيخاف بعد كده يقولك انه غلط.
٢. اوعي تقارنيه بحد!
مقارنة الطفل بأي شخص تاني بتدمر ثقته في نفسه. من أسباب الكذب انه يبان شكله كويس قدام الناس، وده طبعا لانه مش واثق في قدراته.
٣. صاحبيه!
ليه هيكذب عليكي لو انتي صاحبته وبيحكيلك وبتحكيله كل حاجه؟
وجود تواصل كويس بينك وبين طفلك هيحل مشاكل كتير جدا من قبل ماتحصل.
٤. اوعي تقوليله "انت كداب"!
حاولي تفهميه انه مش بيقول الحقيقة من غير ماتواجهيه وتقوليله في وشه انه بيكدب.
لو عملتي كده ممكن يقولك الحقيقة دلوقتي بس هيرجع يكدب تاني وهيبقى اشطر المرة الجاية ومش هتعرفي انه بيكدب.
عقلنا الباطن لما بتقوليله حاجه بيسمع الكلام وبيعملها على طول. يعني لو قلتيله انت كداب عقله الباطن هيخليه يكدب عادي، ما هو كداب!
٥. كلميه عن الحاجات اللي خايفة يعملها من وراكي.
زي السجاير، للمراهقين. لما يعرف المعلومات الصح منك ويشوف معاكي فيديوهات عن ضررها احسن ماياخد المعلومة من واحد صاحبه.
٦. لازم العقاب يكون من جنس العمل.
يعني لو طفل صغير اخد لعبة من صاحبه وروح بيها وفهم غلطته، ماينفعش العقاب يبقى حرمان من اكلة بيحبها او خروجه.
لا هو اصلا مش لازم يبقى عقاب، هو محتاج يفهم "توابع" الامور. يعني هيروح يرجعله اللعبة ويعتذرله.
بس كده كفاية.
٧.خليكي قدوة
يعني لو انت بتكدبي عليه وبتوعديه بحاجات مابتحصلش او بتكدبي على اي حد حتى لو كدبة "بيضا" هيقلدك!
المهم كمان ان الطفل لازم يشترك في إيجاد او التفكير في الحل للمشكلة اللي حصلت. خليه يفهم انه هو اللي فكر في الحل.
يعني طفل قال انه ماعندوش واجب النهارده وهو عنده.
الام تقوله سألتك عندك واجب ولا لأ وقلتلي لأ، تفتكر ايه اللي هيحصل لو ماعملتش الواجب؟
هيقولها "هنقص درجات" مثلا
تقوله طيب ايه رأيك نعمل ايه عشان ده مايحصلش تاني؟
ويتفقوا مثلا انهم يراجعوا الجدول كل يوم مع بعض.
انا عارفة انه صعب على الأم جدا إنها تشوف ابنها او بنتها بتكدب وتحاول تسيطر على نفسها بالطريقة دي. بس ده لمصلحة الطفل. لو انفعلتي هيكدب تاني وتاني وكلنا عارفين كده. يبقى الموضوع يستاهل اننا نجرب طرق جديده للحل ولا لأ؟