ادلعهم ولا اقسى عليهم ؟

دلعه عشان الدنيا مش مستاهلة ولا أقسى عليه عشان الدنيا صعبة؟
أظن ان السؤال ده كتير بيدور في دماغنا واحنا بنربي.
بتقسي عشان انت مقتنعه انه لازم ينشف عشان يقدر يستحمل الحياة بعد كده، وبعدين يصعب عليكي فتدلعيه على الاخر عشان تعوضي القسوة.
صح؟
الحل موجود وهو انك تعملي الاتنين.
الحنان والحزم مع بعض.
kind and firm
دي من أهم ادوات التربية الايجابية، وهي اللي بتضمن التوازن في التربية. ولا يطلع الطفل متدلع وكل طلباته مجابة ولا مقهور وكل حاجه عايزها بيتقاله عليها لا وخلاص!
ولا متلخبط لانك ساعات بتدلعيه وساعات بتقسي!
خطوات الأداة :
لما الطفل بيطلب حاجه مثلا مش في استطاعتي او لو عمل حاجه غلط..
١. اول حاجه بعملها بتقبل مشاعر الطفل واحاول اتفهم اللي حصل من وجهة نظره (احط نفسي مكانه)
٢. تاني حاجة بحاول اديله اختيارات لو كان في امكاني ده.
زي مثلا:
👈🏻انا عارفة انك بتحب البامية جدا وانا كمان بحبها بس حبيبي انا راجعه من الشغل تعبانة جدا ومفيش دلوقتي غير الغدا اللي انا عاملاه ده، تحب تاكل منه ولا اعملك ساندويتش جبنة؟
👈🏻انت نفسك تفضل تلعب ودلوقتي وقت النوم، تحب نحكي قصة ولا تنام علطول؟
❤️انا بحبك والاجابة لأ…
بس كده 😊
الحقيقة ان اهم حاجه في الأداة دي عشان تأثر صح هي الواو اللي بين الكلمتين، يعني لازم الحنان والحزم مع بعض.
في ناس بتفكتر ان الصح انهم يشدوا مرة ويرخوا مرة
وده للاسف بيشتت الطفل جدا وبياخد كل مساوئ الشدة وكل مساوئ الدلع.
الحنان والحزم مع بعض فيهم توازن والأداة دي ميزتها انها بتعلم الطفل مبدأ مهم جدا لحياته بعد كده، ان مش لازم كل حاجه هو عايزها تتنفذ بس ممكن ندور على بدائل والحياة مش هتقف عند حاجة احنا عايزنها وماحصلتش 😊
بتعلمهم المرونة ♥️
الموضوع سهل وبسيط بس محتاج تدريب وشوية شوية هيظبط معاكوا وانا اولكوا والله بغلط وبرجع اظبط سلوكي معاهم تاني.
ربنا يعينا على تربيتهم ان شاء الله 😊

Leave a comment