البراونيز بالعدس 
كلنا تقريبا اتخانقنا مع ولادنا عشان ياكلوا، فيه ناس بتتخانق وتزعل وناس بتضرب وكل واحد حسب الطريقة اللي اتعود عليها.
المهم ان فيه نكد بيحصل ومطلوب من الطفل بقى انه ياكل بعد كل ده.
لا ومطلوب كمان انه مايزعلش عشان انا عايزة مصلحته!
تعرفي انك لما تاكلي وانتي متضررة وغصب عنك، غير انك ممكن ترجعي الاكل أصلا، جسمك مش هيهضمه كويس.
يعني ابقى خسرت ابني عشان شوية اكل وكمان جسمه مش هيهضمه كويس ويستفيد منه!
انا بحثت كتير في الموضوع ده.
كل طفل ليه مزاجه في الكل، زي الكبار بالظبط.
في طفل بيحب الطبيخ، وطفل تاني لأ، عادي.
قعدت ادور اونلاين على أفكار لقيت فكرة اني اخبي الخضار في الاكل اللي بيحبوه.
يعني مثلا صوص مكرونة احمر بالخضار المفروم
كفتة او برجر بالخضار
صينية مكرونة بالبشاميل عادية بس ازود خضار على اللحمة
سلطة بنجر بالتفاح
بطاطا متقطعه ويدجز وعليها شوية زيت وفي الفرن لحد ماتستوي ( بتبقى تحفة)
جربت حاجات كتير وفشلت وحاجات تانية عجبتهم.
من اخطر الاختراعات اللي لقيت طريقتها من ٦ سنين وعجبتهم جدا هي البراونيز بالعدس 
هقولكوا الطريقة بس اوعدوني ماحدش يقول رأيه فيها اللي لما يجرب.
المقادير:
-كوب ونص عدس بجبة مسلوق جامد لحد مايبقى طري خالص، الكوب ونص من المسلوق مش الني.
- نص كوب شوفان كامل
- ٣ معلقة كبيرة كاكاو
- ٣ معلقة كبيرة زيت ( بستعمل زيت زيتون او جوز هند )
- ٣ معلقة كبيرة سكر او عسل ( انا بستعمل عسل)
- بيضة
- ربع معلقة صغيرة بيكنج بودر
- فانيليا
- chocolate chips لو عايزة
- ممكن كمان عين جمل متقطع
الطريقة:
حطي كل حاجه في الكبة واضربيهم كتيير لحد ماتبقى زي عجينة الكيكة بالظبط.
لو هتضيفي ال choc chips او عين الجمل ضيفيهم دلوقتي وقلبيهم.
صبي الخلطة في صينية بورق زبده ومدهون زيت
حطيها في فرن متوسطة لمده ٢٠ - ٢٥ دقيقه تقريبا حسب فرنك
سيبيها تبرد خالص وقطعيها.
طعم العدس مابيبانش خالص ماتقلقيش.
ولو سمحتوا بلاش حد يحكم عليها من غير مايجربها. انا مش بكتب كلام وخلاص، دي حاجه انا شخصيا جربتها وعجبت ولادي وحبيت افيدكوا.