الروتين اليومي اللي كتير حاسين انه صعب.
فكرة الروتين بسيطة جدا.
الحاجات اللي بتتعمل يوميا بنفس الترتيب هنعلقهم بصور قدام الطفل عشان يحفظهم ويفهم انه ماينفعش يعمل حاجه تانية في وقت الحاجات دي.
انا مش بقول اننا هنعمل جدول كامل لليوم كله، ولو ان فيه ناس بتحب تعمل كده، بس مش ده موضوعنا دلوقتي.
انا عايزة اعمل روتين صباحي اول مانصحى من النوم وروتين مسائي قبل النوم.
ده هيعلم الطفل النظام وهيقلل الخناق والزعل، لانه لما يبقى عارف انه اول مايصحى هيدخل الحمام ويغسل سنانه وهكذا، غالبا مش هيصحى يدلق لعبه على الأرض ويلعب. هيلتزم بالروتين.
باختصار، انا كأم بشوف ايه الحاجات اللي ابني المفروض يعملخا اول ما يصحى مثلا وبرسمها معاه في جدول او بجيب صور من النت واطبعها والزقها في جدول بالترتيب.
لو كبير شوية هنقعد مع بعض ونتفق عليهم مع بعض.
بس كده والله الموضوع بسيط، بس بيفرق جدا مع الطفل لانه لما بيشوفه قدامه على طول مابينساش وبيعرف ان الروتين هو اللي بيحكمنا دلوقتي. مفيش اختيار.
بعد ما يخلص الروتين بقى يبقى يعمل اللي هو عايزه.
يعني لو يوم مدرسة هيعرف انه لو خلص الروتين قبل معاد الباص او النزول، ممكن يلعب بحاجه او يتفرج شوية على التلفزيون او اي حاجه تانية هو عايزها.
الجدول اللي في الصورة ده مثال بس.
كل بيت ليه الروتين بتاعه وترتيبه المختلف. ممكن احط الصلاة عشان يتعود انها في الروتين الصباحي مثلا
وممكن يبقوا صور بس من غير كلام مكتوب.
وطبعا روتين المدرسة غير الاجازة.
جميل اوي بجد