بتسيبوا ولادكوا يطلعوا الزخليقة بالعكس ولا لأ؟

بتسيبوا ولادكوا يطلعوا الزخليقة بالعكس ولا لأ؟

19 يناير 2022
بتسيبوا ولادكوا يطلعوا الزخليقة بالعكس ولا لأ؟
اصل الموضوع مش موضوع زحليقة بس!
الأطفال معظمهم بيحبوا المغامرة، بيحبوا مايسمعوش الكلام، بيحبوا يكسروا القواعد، ده طبيعي.
هما بيحاولوا يفهموا حدودهم وبيحبوا يجربوا كل حاجه بنفسهم.
اللي بيفرق هو رد فعل الأم.
فيه أم بتحب تمشي على القواعد تماما، دي مش هتوافق انه يعمل كده.
وفيه ام تانية ماعندهاش مشكلة ان القاعده تتكسر طالما مش هيأذي حد.
أنا طول عمري زي الأم الأولى دي، بس مؤخرا قررت إني أعمل زي التانية، لأني لقيت الموضوع أكبر من مجرد زحليقة. الموضوع ليه علاقة بكذا حاجه:
- احساس المغامرة لوحده بيعمل سعادة واحساس بالانتصار عند الطفل
- طلوع الزحليقة بالعكس محتاج قوة وارادة واكتر من محاولة فاشلة عشان يوصل، هيتعلم المثابرة
- زي ما بنطلب من الكبار انهم يخرجوا برة الصندوق ويتحملوا المخاطرة، الأطفال كمان هيفرق معاهم جدا المخاطرة بتاعت طلوع الزحليقة. شوية قلق من الوقوع مش هيضر الطفل، بالعكس هيفيده.
- لما الطفل بيمر بفشل انه يطلع ويحاول ويوصل، ده بيزود ثقته بنفسه وبيعلمه ان النجاح بييجي بعد الفشل.
طبعا انا مش هوافق انه يعمل كده لو فيه أطفال تانيين على الزحليقة.
أنا بقوله ان لو الزحليقة فاضية اعمل اللي انتي عايزة لكن لو فيه طفل تاني عايز يتزحلق لازم تسيبه ينزل.
ودي حاجه كمان هيتعلمها، وهي انه حر في حدوده وطالما مش بيأذي حد او نفسه.
"انت حر ما لم تضر"
انتي بتوافقي انه يعمل كده ولا لأ؟

رابط للمشاركة

Use this link to share this article

ا الاء صلاح
4 يوليو 2022

بسيبو الصراحه

م مروة ممدوح
25 يونيو 2022

بعد صراع داخلي مع نفسي بسيبها