أكتر حاجة بتخوف كل أم مع دخول المدارس وبداية فصل الشتاء هي المرض. طبعا فيه دور كبير على طبيب المدرسة انه ياخد باله ويشخص الأطفال بدري ويبلغ الاب او الأب ان ابنهم او بنتهم كده ممكن تبقى مصدر عدوى وبالتالي المفروض أن الطفل يرتاح في البيت لحد مايخف ومايبقاش معدي لغيره.
بس تعرفوا ان احنا كأولياء أمور بإدينا اننا نمنع عن ولادنا معظم الأمراض المعدية في المدرسة؟
أهم حاجة إننا نبدأ من سن صغير نعلم ولادنا يعني ايه النظافة الشخصية، وأهميتها، وأهمية غسيل الإيدين وإزاي يغطي بقه لما يعطس ويعمل ايه بعد كده.
اول حاجة النظافة الشخصية. في فيه الصور بوستر بسيط عن النظافة الشخصية للأطفال ممكن تطبعوا وتعلقوه وتتكلموا معاهم عنه.
النظافة الشخصية مش بس بتمنع الأمراض دي كمان بزود ثقة الطفل بنفسه وبتخلي الناس تحب تبقى معاه فبالتالي يعرف يعمل صحاب لأن من اكتر الحاجات اللي بتبعد الناس عن شخص هي رائحة الجسد والفم الكريهة، صح؟
أهم الحاجات في النظافه الشخصية للطفل هي:
-غسيل الايدين:
لما يبقى شكلهم مش نظيف
بعد الدخول للحمام
بعد العطس في اليد
بعد لمس الحيوانات في الشارع
عند الرجوع للبيت
-تغطية الفم عند الكحه او العطس: وده حسب الموقف
لو في ايده منديل يعطس او يكح فيه وبعدين يرميه
لو مفيش منديل يعطس في كمه من فوق شويه
-الاستحمام يوميا بعد المرسة
-غسيل الاسنان بانتظام
-قص الاظافر بانتظام
-تسريح الشعر بالمشت للتأكد من عدم وجود حشرات الشعر
-لبس ملابس نظيفه باستمرار (وده مش معناه ان الأطفال ماتلعبش وتاخد راحتها وتوسخ نفسها عادي، بالعكس، بس بعد مايروح لازم الهدوم دي تتغسل ويلبس لبس نظيف)
دي النظافة الشخصية للطفل باختصار جدا، لو ليكوا أي استفسارات اكتبوها في التعليقات واعملوا شير عشان ناس اكتر تعرف المعلومات دي ونقلل فرص العدوى في المدارس ان شاء الله
اطبعوا الصور دي وعلقوها في غرف ولادكوا عشان يفتكروا التفاصيل دي علطول.
وربنا يبارك فيهم ويمنع عنهم المرض دايما ان شاء الله