٣ غلطات بتخلي ابنك يهرب من المواجهة
اتفاجتني ان صاحبه اخد منه لعبته المفضلة وهو متضايق بس ماعرفش يقوله حاجه؟
عايزة اكلمك عن ٣ غلطات ممكن تكوني بتعمليهم خلوا ابنك يخاف من المواجهة.
١. مش عايزاه يقولك "لأ"
غالبا احنا بيبقى صعب علينا ان ولادنا يقولولنا لأ.
لازم يسمع الكلام ويبقى مطيع. صح؟
لأ غلط!
هو لما يتعود مايقولكيش لأ، هيتعود مايقولش لأ للناس كلها، مش انتي بس.
يعني مش هيعرف يقول لصاحبه لأ ماتاخدش لعبتي. ولا هيقول لأ لصاحبه اللي بيعزم عليه بسجارة، لما يكبر.
هو لازم يتعلم يقول لأ. الاول هيقول لأ على كل حاجه، مع شوية توجيه هيبدأ يفهم ازاي يقول لأ بس على الحاجات اللي هو مش عايزها.
وانت محتاجه تعرفي ان مش كل حاجه بتقوليها لازم يوافق عليها. فكري الاول، هيحصل ايه يعني لو عمل اللي هو عايزه المرة دي؟
لو مش هتفرق يبقى اديله فرصته!
٢. بتتكلمي بداله.
بتردي بداله، عشان تقولي الصح.
بتفكري ساعات بداله، عشان انت شايفة ان اختياراتك هي الأصح.
هيواجه ازاي وهو أصلا اصلا ماتعودش يرد؟
٣. انت نفسك بتخافي من المواجهة.
هو ماشافكيش قدوة ليه في الموضوع ده.
بتخافي تذسفي حد وبتيجي على نفسك بس عشان شكلك يبقى حلو قدام الناس.
مش عاملة لنفسك خاطر ومابتعمليش حاجه مخصوص لنفسك.
الطفل بيحس وبيفهم ان الصح ان الواحد مايواجهش حد باللي هو عايزه عشان مايزعلش منه حد. فبيعمل زيك.
ايه اللي محتاجه تعمليه عشان تساعدي ابنك يواجه؟