قاضي العيال شنق نفسه!
جربتي تدخلي في خلاف بين ولادك وتحاولي تحليه؟
حصل ايه؟
غالبا الموضوع بيقلب بإنك تشدي شعرك أو شعرهم أيهما أقرب 
وبعدين بتلاقيهم في لحظة رجعوا يلعبوا مع بعض عادي جدا كأن مفيش حاجه حصلت، مش كده؟
ايه الحل؟
اولا سيبيهم تماما وماتخليش الا لو الموضوع خلاص هيقلب بضرب مثلا او حاجه مش لطيفة.
الأطفال محتاجين ياخدوا فرصتهم إنهم يتعلموا حل المشاكل والتفاوض، ودي احسن وأأمن فرصة ليهم إنهم يتعلموا الحاجات دي.
لما تسيبيهم من غير تدخل، وتعملي نفسك مش واخده بالك خالص، هيفكروا لوحدهم ازاي يحلوا مشكلتهم. في الأول الموضوع هيبقى صعب شوية وبعد كده هيتعودوا.
المهارات دي مهمة جدا لحياتهم بعد كده خلي بالك.
طيب تدخلي امتى؟
الطفل غالبا بيكون لسه مش عارف ازاي يتحكم في غضبه. مابيعرفش امتى يوقف عشان الموضوع هيقلب بنكد.
هنا دورك انك تدخلي، قبل الخناقة الحقيقية.
١. قبل ما يحصل عياط او ضرب ابعديهم عن بعض، كل واحد في ناحية
٢. هدي اعصابك خالص
انا عارفة ان ده تقريبا مستحيل 
بس انتي كمان هتحتاجي تدربي نفسك. انتي عايزة تهدي الموقف وتعلميهم التصرف الصح في المواقغ اللي زي دي.
لو زعقتي فيهم انتي كمان هيتعلموا انهم يزعقوا هما كمان
٣. ممكن تقوليلهم انكوا هتتكلموا في الموضوع بعدين، ممكن حتى بالليل او تاني يوم.
ماحدش بيستوعب او بيتصرف صح وهو غضبان، علميهم انهم مايتصرفوش اي تصرف في حاله الغضب.
٤. خليكي عادلة
لو هتعاقبي لازم تكونوا متفقين عليه من قبل كده. ويكون ليه علاقة بالحدث نفسه. يعني نكون متفقين ان لو اتخانقتوا على لعبة هتشيلي اللعبة خالث، ماتديهاش لحد فيهم.
ماينفعش برضه لو اتخانقوا على لعبة يتحرموا من اللعب في النادي مثلا او يتحرموا من حاجه بيحبوها.
انا أم زيك وفاهمة جدا احساسك، وان الكلام ده ممكن يكون مستحيل. بس صدقيني هما يستاهلوا انك تحاولي وتجربي حاجه جديدة عشانهم.
وأظن كلنا عرفنا ان طريقة شد الشعر ممكن تسكتهم في اللحظة بس لكن المشكلة بترجع تاني.
احنا عايزين نعلمهم مهارات يعيشوا بيها طول عمرهم 
عرفتي ليه قاضي العيال شنق نفسه 