ليه الطفل وخصوصا في السن الصغير بيبقى جميل ووديع مع جدته او في الحضانة ويروح البيت يوريكي الوش تاني؟
نور بنتي خلال اول اسبوع ليها في الحضانة بدأت الاحظ عليها حاجات غريبة جدا.
من اول ماتروح بتتصرف بطريقة عنيفة جدا وبتعند في كل حاجه وكل ماقولها حاجه تقول لأ وتمسك اللعب وترميها وهي عارفه انها مش المفروض تعمل كده.
لما فكرت، لقيت انها ماتلحقش في اسبوع تلقط تصرفات من الحضانة مثلا وتقلدها، مع انها عندها استعداد عالي للانحراف 😂، بس حسيت ان الموضوع اعمق من انها بتقلد حد.
هي فيه حاجه جواها ومش عارفه تعبر عنها..
لما قريت في كذا حتة اكتشفت ان الطفل لما بيقعد مع حد غير امه، يعني جدته مثلا او الحضانة، بيحاول يبان انه جميل ولطيف عشان مايزعلش منه حد، وبعدين اول مايبقى مع أمه، اللي هي بالنسبة له الأمان كله، بيطلع عليها كل اللي كان محوشه طول اليوم 😅
يعني من الآخر كده، هي دي طريقة الطفل انه يقول لأمه "أنا بحبك وبطمن وأنا معاكي، وواثق اني مهما عملت فيكي هتفضلي تحبيني"
من الحب ما قتل 😂😂
تعملي ايه بقى في الحالة دي؟
طبعا لو الموضوع قلب بزعيق وضرب مش هنوصل لحاجه والمشكلة هتكبر، والطفل شوية شوية هيفقد احساس الامان اللي اصلا كان بيخليه يتصرف كده براحته من الاول.
الحل انك
١. اكيد ماتوافقيش على التصرفات دي، يعني ماينفعش تضحكي وتشجعيها ابدا.
٢.هتحاولي تشغليه وتشتتي انتباه الطفل عن اللي هو بيعمله بحاجه تانية هو بيحبها.
٣. تاخديه في حضنك كتير اوي، زودي الاحضان
٤. لازم تزودي الوقت الخاص اللي بتقضيه مع الطفل بأي طريقة، وهو ده الحل الجذري.
والوقت الخاص مش معناه انك تقعديه جنبك في المطبخ وانتي بتطبخي،
هو مش هيهدأ ويطمن الا لما تقعدي تقريله كتاب او تحكيله قصة او تلعبي معاه بالكورة او اي حاجه انتوا الاتنين تعملوها مع بعض هو بيحبها.
الموضوع بسيط، أهم حاجه اننا نبقى فاهمين سبب التصرف عشان نعرف نحل المشكلة ان شاء الله 😊
طيب هو طبيعي لو هو نشيط في البيت ودمه خفيف
يبقى في الحضانه هادي ومطيع اوي
ولا اعرف ان المعامله هناك فيها مشكله
هي ٣ سنوات