ليه لازم تفرحي إن عندك طفل عنيد؟
مفهوم طبعا ان العند صفة مش محبوبة، وان الطفل العنيد او الانسان العنيد عموما متعب في التعامل معاه.
بس المفاجأة ان الطفل العنيد ده نعمة كبيرة لو ساعدتيه بدل ما تكسريه.
ايه مميزات الطفل العنيد؟
١. عنده اصرار ومثابرة
عشان هو عنيد هيبقى عنيد في التحديات اللي بيقابلها في المدرسة وفي الحياة، مش هيستسلم بسهولة
٢. ماحدش هيقدر يتنمر عليه او يضايقه.
العند هيخلي الطفل مايستسلمش لحد بيضايقه، مش هيسكتله
٣. هيطلع ناجح في حياته
لانه مابيستسلمش وبيصر على اللي هو عايزه، مش هيسيب نفسه يمشي في طريق هو مش عايزه، هو عارف هو عايز ايه وبالتالي هيمشي في الطريق اللي هو هيختاره لنفسه واللي هو حابه، ودي اول بذرة للنجاح
٤. وهو مراهق مش هيمشي ورا اي حد يقوله تعالى نعمل حاجه غلط، لا هو ليه دماغه وقراره ملكه.
لو اتأسس صح وعارف الصح من الغلط مش هيرضى يعمل الغلط عشان واحد صاحبه عايز كده.
٥. هيبقى قائد
اكتشفوا ان القادة اللي نجحوا في شغلهم وحياتهم كانوا اطفال عنيدين. كلام منطقي، صح؟
النجاح كمان بيكون في الرياضة، وفي العلاقات
٦. عمرك شوفتي بطل رياضي مش عنيد؟
حتى النجاح في الرياضة محتاج شخصية عنيدة ماتستسلمش للخسارة، بيقوم ويكمل
طيب اتعامل معاه ازاي؟
أكيد ده سؤالك دلوقتي، وعارفة ان الموضوع صعب بس لو انت مقتنعة انه مش بيعند عشان مابيحبكيش او عشان يعمل مشاكل وخلاص، وان هو طبيعته كده، هترتاحي شوية
لو كسرتيه او عندتي معاه، يإما هيعند معاكي اكتر ومن غير سبب، وهيطلع انسان عنيد من غير هدف للعند
يإما هيتكسر ويخاف يقول رأيه وفي الحالة دي هيطلع متلخبط وعنده مشكلة في ثقته بنفسه ومشاكل تانية.
هتتعاملي مع الطفل ده ازاي؟
الطفل العنيد زيه اي حد محتاج ياخد مساحته، يعني اديله فرصه يقول رأيه، لو عايز حاجه وانت مش عايزاها فكري الاول، انتي فعلا مش عايزاها عشان ماتنفعش ولا مفيش سبب مهم؟
لو مفيش سبب مهم، اديله فرصته وسيبيه يختار
لو الحاجه دي ماتنفعش فعلا هتعملي اقرار مشاعر.
يعني هتقوليله أنا حاسة بيك وفاهمة انك عايز كذا، بس للاسف مش هينفع عشان كذا
واديله اختيارات تانية.
الحياة طبعا اصعب من كده وفيها تحديات والحكاية مش بالسهولة دي، بس بعد ماعرفتي ان العند ده حاجة ايجابية مش سلبية، نفسيتك هترتاح جدا ورؤيتك للمشكلة هتتغير ان شاء الله 