عارفة لما تسندي حد من ظهره زي الصورة كده، بس وقت طويل، هيحصل ايه لما تسيبيه؟
غالبا هيقع على ظهره!
ده لأنه كان معتمد عليكي وسايب نفسه خالص.
دي طبيعه البشر.
لما الانسان بيلاقي الراحه غالبا مابيدورش على التعب.
ابنك ينطبق عليه نفس الكلام،
لما تشيليه تماما، يعني تعمليله حاجته كلها خصوصا اللي بيعرف يعملها، عضلاته بتضعف.
بيخاف يجرب حاجه جديده
بيخاف يغلط!
ولما تحليله مشاكله كلها
مابيتعلمش مهارة حل المشكلات.
اديله فرصته يقع وقعات صغيرة وهو صغير عشان لما يكبر هتضطري تسيبيه وساعتها ممكن يقع واقعه تعور لا قدر الله..
اعرف راجل كبير مابياكلش سمك خالص لأنه اتعود ان باباه كان بيفصصله السمك لحد مابقى كبير ومابيعرف ياكله لوحده!!
واعرف واحد باباه كان بيقصد يخليه يكنس بالمكنسة اليدوية مع وجود مكنسة كهربائية عندهم بس عشان لازم يتعلم المهارة دي لحياته..
مش بقول ماتسنديش ولادك، كوني ليهم سند طبعا بس لازم تفرقي بين اللي محتاجين يتسندوا فيه واللي يقدروا يتعبوا شوية ويعملوه لوحدهم، ويتعلموا حاجه جديده.
وخلي بالك انهم لو متعودين انك بتعمليلهم كل حاجه مش هيبقى سهل انك تسيبيهم مرة واحدة، الموضوع محتاج تدريج، لحد مايتعودوا.