وجبة صحية كاملة

وجبة صحية كاملة

17 يناير 2022
لما بنسافر مصيف، روتين الاكل بيتغير وبيبقى صعب اني اقدم للولاد وجبة صحية كاملة زي ماحنا متعودين.
لو كلنا برة غالبا بيبقى الاكل ناقص الخضار و السلطة.
كنت قبل كده بحس بالذنب ودي حاجه كانت بتضايقني وتخليني مش عارفة استمتع بالفسحة.
وبعدين اكتشفت ان مش هما اليومين دول اللي هيأثروا على صحتهم.
ده غير اني اقدر اعوض ده بإني اخد معايا اكلات خفيفة صحية اقدر اشيلها وماتبوظش زي المكسرات والفواكه المجففة.
كمان فيه فاكهة زي التفاح بتستحمل الحر وممكن يتشال معانا وناكله لما نجوع بدل الشيبسي والبسكوت والحاجات دي.
على البحر، بدل الحلاوة والبسكوت بقيت باخد معايا تمر، بيحبوه اوي وبيديهم طاقة ومفيد جدا.
بلاش بيبسي وشيبسي وعصاير معلبة والحاجات اللي مليانة سكر دي يا جماعه.
فيه بدائل كتير صحية هنتبسط اننا بنقدمها لولادنا ومش هتأذيهم.
وحتى لو اغلى شوية، اولا صحة ولادنا اغلى، ثانيا الاكلات الصحية بتشبع لكن الحاجات التانية دي بتجوع وبتخليهم عايزين تاني وتاني.


رابط للمشاركة

Use this link to share this article