٥ خطوات عشان تعلمي ابنك يشكر الناس 
هحكيلك حكاية،
اتكسفت منى من رد فعل بنتها (6 سنين) لما خالتها - اللي اول مرة تشوفها – أخذتها في حضنها وقدمت لها هدية. البنت اخدت الهدية ومشيت ولا حتى قالت شكرا!
قعدت تلعب باللعبة الجديدة بدون أي إحساس بمشاعر خالتها وأمها!
تفتكروا الطفلة دي جاحدة؟ ولا ماعندهاش ذوق مثلا؟
أكيد لأ!
الطفلة دي ماتعرفش أصلا يعني إيه تبقى جاحدة أو ممتنة. كل اللي فكرت فيه إن الست الغريبة دي (اللي هي خالتها اللي عمرها ما شافتها قبل كده) اقتحمت خصوصيتها وعايزة تحضنها بدون اذنها. وعشان هي ماكانتش مهيئة نفسيا لكمية المشاعر بتاعة خالتها دي، طبيعي جدا انها تحس بالخجل وتنفر من الموقف كله.
عموما الاطفال بيبقوا محتاجين مساعدة في فهم مشاعرهم، عشان كده الاهل بيبقى ليهم دور كبير في غرس مشاعر زي شعور الإمتنان عند الاطفال.
هو احنا ليه مهم اننا نعلم ولادنا الإمتنان؟
هو مش الشعور بالإمتنان جزء من اللباقة الإجتماعية والذوق؟
موضوع الإمتنان أكبر من مجرد مظهر إجتماعي. علماء النفس إكتشفوا الأشخاص اللي اتعودوا يعبروا عن امتنانهم بشكل دائم للناس اللي حواليهم، وبيشكروا ربنا باستمرار على الصحة وعلى كل نعمه، بيبقوا سعداء في حياتهم عموما أكتر من غيرهم، وبيبقوا قادرين يفهموا نفسهم واحتياجاتهم اكتر، وبيبقى عندهم تقدير لمشاعر اللي حواليهم ولظروفهم.
دي خطوات ممكن الاهل ينفذوها عشان يغرزوا مفهوم الامتنان عند الاطفال:1. قولوا كلمة شكرًا
لما تكون كلمة «شكرًا» مستعملة بشكل دائم بين افراد الأسرة، هيبقى طبيعي إن الطفل يستعملها حتى لو بشكل متقطع في الاول
2. أن يكون الإمتنان شعورًا يعيشه الأهل
الأهل لازم يبدأوا هما بإظهار التقدير والإمتنان عن طريق إبداء الإهتمام بمجهود عمله الطفل، يعني مثلاً لما الأم تقول لإبنها: «غرفتك شكلها جميل جدًا، خصوصًا إن الألعاب في صناديقها. أنا سعيدة جدًا إنك افتكرت وحطيتها في مكانها».
3. تعليم الطفل من خلال اللعب
إذا كان الطفل بيتكسف من انه يقول كلمة شكرًا في وسط ناس كتير، ممكن الام تعلمه من خلال اللعب. زي مثلا انها تجيبله عرايس ويمثلوا انهم بيشكروهم أكنهم ناس حقيقيين.
4. ابتكار روتين يومي أو أسبوعي
عن طريق طرح سؤال عادي، عن الحدث اللي حصل مع الطفل وخلاه يحس بالإمتنان، ويكون ده مثلا قبل النوم أو على العشاء في وسط الكلام.
بالطريقة دي الطفل هيفكر في الحاجات الجميله اللي حصلت له، وشوية شوية يفهم اهمية الإمتنان للشخص اللي خلاه مبسوط
5. الشكر على الهدايا
لازم الطفل يتعود انه يشكر كل حد جابله هدية، او حتى جاله عيد ميلاده مثلا وفرحه. الأم لازم تصر انها تتصل بكل اللي عملوا كده وتشكرهم قدامه وتديه التليفون هو كمان يشكرهم.
الطريقة دي هتخلي الامتنان عادة عند الطفل بقية حياته.
وأهم حاجة إن الأهل نفسهم يمارسوا الإمتنان ومايكتفوش بالنصيحة!
بتعملوا ايه عشان تعلموا ولادكوا يشكروا الناس؟
انا فعلا لما بخليه يجبلي حاجه بشكره و علمته عفوا رغم ان هو مش بيعرف يعبر عن مشاعره بس لما حد بيعمله حاجه بيشكر و هو مبسوط بس لسة مجربتش لو في تجمع حيعمل ايه