تعرفوا الأطفال محتاجين يلعبوا برة في مكان مفتوح قد ايه؟

تعرفوا الأطفال محتاجين يلعبوا برة في مكان مفتوح قد ايه؟

كل يوم..

كل يوم الطفل عشان ينمو نفسيا وجسديا بطريقة سليمة محتاج يجري ويلعب ويتنطط في مكان مفتوح.
محتاج كمان يكتشف الطبيعة ويلمس الشجر ويراقب الحيوانات وحتى الحشرات.

الاطفال محتاجين يركبوا عجل ويتمرجحوا ويتزحلقوا ويتمرمغوا في الأرض ويتوسخوا كمان  😁

محتاجين ينطلقوا بعيد عن الشاشات والمولات والبيوت.

الجو بقى جميل الحمد لله 😊

خرجوا ولادكوا في الجو الحلو ده على قد ماتقدروا..

اجازة سعيدة ♥️

وياريت تشاركونا في التعليقات الأماكن الحلوة اللي بتودوا ولاكوا يلعبوا فيها وتكون مناسبة للاطفال وفيها طبيعه 🌿💚

تعديل مهم جداً :
اولا انا مش عاملة البوست عشان احسس حد بالذنب. انا عارفه ان الموضوع صعب بسبب الواجب ومشاغل الحياة وانا شخصيا مابعرفش اعمل كده، بس ده مش معناه اننا نغمي عينينا ونقول الكلام غلط، لا الكلام ده علميا صح ومهم اننا نعرف الصح ونحاول نعمل منه اللي نقدر عليه.

ثانيا بالنسبة للأماكن فمش لازم يكون نادي او جنينة جميلة. احنا مشتركين في نادي، ومع ذلك يوسف ابني بيتبسط اكتر في حديقه عامة جنبنا ماحدش مهتم بيها اصلا، ومسميها الجنينة الصحرا 😅
بنروح نستكشف ونشوف الحشرات ونكتشف الحاجات اللي مرمية في وسط الرملة!
وبنرجع كلنا مبسوطين على فكرة 😊

الموضوع بسيط 😍