عمرك حسيتى انك واحدة عادية جدا وان مافيش أى حاجة فيكى تخليكى واثقة فى نفسك؟ أو إنك مش جميلة كفاية، مش نحيفة كفاية، مش جذابة كفاية؟ أو إنك تايهة ومش عارفة تعملى ايه فى حياتك؟
الطريقة الوحيدة اللى تساعدك تتخلصى من كل المشاعر السلبية دى هى إنك تعرفى نفسك كويس لأن ده اللى هيساعدك تعيشى حياتك بالطريقة اللى تريحك، وتحسى انك راضية عن كل القرارات اللى بتاخديها وكل اللى الاختيارات اللى هتختاريها.
البنات والستات بشكل عام عندهم قيود بتمنعهم من انهم يعيشوا حياتهم بالطريقة اللى تريحهم، فى الكتاب ده هتعرفى ايه هى القيود دى وهتتعلمى ازاى تواجهيها بكل ثقة.
الفصل الأول: هتلاقى خمس مواضيع مهمة تعرفك نفسك وتساعدك على أكتشافها لما تقريهم هتبدأى رحلة اكتشاف الذات الخاصة بيكى انتى وهم (الوعى الذاتى - الوعى العاطفى - نقاط الضعف ومواطن القوى - الطاقة الأنثوية والذكورية - تقدير الذات).
الفصل التانى: هتقابلى خمس أصدقاء حقيقيين وجودهم فى حياتك هيساعدك تستمتعى بحياتك وتزودى سلامك الداخلى وهم ( الامتنان - الشخصية الحازمة - حب المعرفة والتعلم الذاتى - الطفلة اللى جواكى - أهدافك الخاصة).
الفصل التالت: هتعرفى أعدائك المستخبيين وهتتعلمى ازاى تتجنبى خطرهم على حياتك بشكل عام وهم (الميديا - العشم - المقارنة - الناس السامة - المعتقدات الغلط).
