The power of vulnerability..
بعترف اني ضعفت.. وتعبت واتقوقعت الفترة اللي فاتت..
ومين فينا ماتعبش؟ ومين ماقلقش؟
تعبت وضعفت لدرجة اني ماكنتش قادرة اكلم حد، ولا قادرة ارد ولا عايزة اسمع "مالك" عشان ماكنتش قادرة احكي.
كنت كل فترة احاول اطلع واتكلم واحكي، الاقي نفسي رجعت تاني بسرعة، مش قادرة!
وحتى ماقدرش ارد على الناس اللي تواصلت معاهم وانا بحاول اساعد نفسي.
بس المشكلة مش في التعب، المشكلة كانت في رفض التعب.
يعني مشكلتي كانت اني مش قادرة اتصور اني وصلت للمرحلة دي، وكنت رافضة ده جدا، ومتضايقة من نفسي جدا.
وعمالة اتفرج على الفيسبوك على الناس اللي بتهزر وتضحك واقول اكيد العيب في، ماينفعش اللي انا فيه ده!
كمية رسايل سلبية اديتها لنفسي رهيبة.
كان فيه ناس بتحاول تساعدني بس انا كنت ببعدهم، لاني شايفة اني انا السبب في ده وانا اللي لازم اساعد نفسي!
حضرت محاضرة النهارده اونلاين عن "الضعف"
ويعني ايه ان تبقى قوتي في الاعتراف بضعفي.
كلمتين شقلبوا تفكيري، وغيروا نظرتي لضعفي ده.
ضعفي ده حاجه حلوة مش وحشة!
ومن الحاجات الحلوة اللي اتعلمتها اني اتعلم اتقبل غلطي، وماخافش اجرب واغلط لان ده اللي هيقويني ويساعدني احسن ادائي وهيخليني مبسوطة من نفسي كمان..
بقالي اسبوع جايبة الوان ولوحة رسم وفرش ونفسي اعمل الرسمة دي وخايفة تطلع مش مظبوطه. لدرجه اني كنت خلاص هعملها مثلثات متساوية عشان اضمن انها تبقى مظبوطة واريح دماغي.
بعد المحاضرة دي، قررت اني هجرب واللي يحصل يحصل.
هيحصل ايه يعني لو طلعت مش حلوة؟ هتعلم وهعملها احلى المرة اللي جاية 😊
وعملتها وطلعت كده، وعجباني جدا الحمد لله 😊
واتعلمت ان الاعتراف بالضعف بيقوي، جدا..
شيرين_هيكل
