حاسة بالذنب طول الوقت؟ سيبيهم يزهقوا!
ساعات هتنامي بالليل وانتي راضية عن نفسك كأم وشايفه انك احسن أم في الدنيا وكتير هتنامي وانتي حاسة بالذنب وشايفه انك ماتستاهليش تبقي أم.
ده اسمه mom guilt
او الاحساس بالذنب عند الأمهات
ده احساس عادي جدا..
معظمنا حسيناه
بس اللي مش عادي بقى إنك تحسيه طول الوقت! على طول حاسة بالذنب، وحاسة انك غلطانة في حقهم، وحاسة انك مش قد المسؤولية دي، وايه اللي انتي عملتيه في نفسك ده.
والاحساس ده للاسف بيخليكي يا إما تدلعي زيادة وتعمليلهم كل اللي هما عايزينه من غير حساب أو انك تبقى عصبية جدا ومش طايقة نفسك ولا طايقاهم.
مش ده بيحصل؟
طيب ايه الاسباب وايه الحل؟
١. من اهم اسباب الاحساس بالذنب عند الامهات هو المقارنه بأمهات تانية.
الحل ايه؟
ثقي في نفسك وامكانياتك
لما تبقي محتارة في حاجه حاولي تدوري على المعلومة بنفسك على النت. لما بتسألي الامهات التانية، أولا ممكن تاخدي نصيحه غلط وثانيا ممكن حد يقولك حاجه انتي ماتقدريش تعمليها لاسباب كتير. ساعتها هتحسي بالذنب وهتحسي انها ام احسن منك، وده مش صح
٢. عايزة تشيلي الشيلة لوحدك عشان مش واثقة في حد وخايفة اي حد، حتى لو مامتك، تدخل في تربيتهم بطريقة انتي مش عايزاها؟ 
الحل:
من الاخر، مش هينفع تشيلي لوحدك!
لو ظروفك انك لوحدك ومفيش حد يساعدك ده موضوع تاني، بس لو فيه ناس ممكن تساعدك امسكي في اي فرصة تجيلك.
لو اهلك مش قريبين اتصاحبي على الجيران، ابدأي انتي وساعديهم، اعرضي انتي عليهم المساعدة، اعملي اصحاب، وادخلي في مجتمعات الامهات واتعرفي عليهم وساعدوا بعض.
٣. الموبايل مش احسن منك!
زي مابتتأكدي ان الموبايل اتشحن كل يوم عشان مايفصلش منك، انتي كمان محتاجه تشحني. محتاجه اي وقت لنفسك تعملي فيه اي حاجه حتى لو تقعدي ساكتة لوحدك شوية، لو ده هيريحك.
انا من ساعه مابدأت اعمل كده وانا فعلا احسن كتير الحمد لله.
احساس الذنب بيزيد مع التعب لأنك بتبقي حاسة ان طاقتك خلصت ومش قادرة تأدي دورك كويس فبتحسي بالذنب.
٤. و أهم سبب من وجهة نظري انك فاكرة انك لازم تبقي عارفه تلعبي وتسلي الولاد طول ماهم معاكي عشان مايزهقوش، وخصوصا مع قاعده الأجازة والكورونا.
الحل ايه؟
سيبيهم يزهقوا!
زي ماقريتي كده 
الزهق مفيد جدا ليهم عشان يتعلموا يحلوا مشاكلهم ويبتكروا ويطلعوا افكار جديدة للعب.
الزهق مفيد جدا ليهم عشان يتعلموا يحلوا مشاكلهم ويبتكروا ويطلعوا افكار جديدة للعب.مش لازم كل حاجة بيعملوها تبقى متخططة، ومش لازم برضه اول مايزهقوا نديهم الموبايل عشان يتسلوا!
سيبيهم يحسوا بالملل عشان يفكروا ويشغلوا مخهم.