٨ خطوات عشان تحببي ولادك في القراءة 
اقولك سر؟ انا مابحبش أقرأ 
انا فعلا بصعوبة جدا لما بعرف اندمج مع كتاب واقراه..
صحيح لو عجبني بكمل بس البداية دايما صعبة 
بس لازم اقرأ
أصل ماينفعش ماقراش!
بقرأ كتب في التربية وبقرأ في التسويق والبيزنس عموما وبقرأ كمان كتب في علم النفس والمشورة
حاليا انا بقرا كتاب Social intelligence ل Daniel Goleman ومستمتعة بيه جدا الحمد لله
المهم اني عشان عارفة ان انا مابحبش اقرأ اجتهدت اني اطلع ابني بيحب القراءة
والحمد لله ده حصل 
طبعا انا مش محتاجه اقولك أهمية القراءة للكبار وللاطفال 
النهارده حبيت أقولك ٨ خطوات تحببي بيها ولادك في القراءة:
١. اقري لولادك من وهما لسه صغيرين:
انا بدأت أقرأ لابني وهو عنده ٦ شهور تقريبا، وكنت بسمع طبعا تريقة وكلام زي انتي مستعجلة على ايه ودلوقتي المفروض تديله عضاضة مش كتاب، بس انا ماكانش بيهمني الكلام ده
٢. روحي معاهم المكتبة بانتظام:
خلي الطفل يتعود على مشوار المكتبة ويحبه ويبقى مستنيه، كل ماتبدأي ده من بدري كل مايبقى اسهل ويحبوا الكتب اكتر
٣. بلاش تجبريهم على القراءة:
بالنسبه للاطفال اللي لسه صغيرين و لسه بادئين يتعلوا القراءة، القراءة نفسها بتبقى بالنسبة له مهمة شاقه، فعشان ماتخليش الطفل يكره وقت القراءة، هاتيله كتب فيها صور اكتر واقري معاه من غير اجبار على القراءة نفسها. وماتستعجليش، شوية شوية هيقرأ بسهولة
٤. ماتبطليش تقري معاه بمجرد انه بقى بيقرأ لوحده:
القراءة مع الطفل تعتبر متعة للطفل، وهو ده اللي بيحبب الطفل في القراءة، لانه بيعتبره وقت خاص الاب او الام بيستقطعه عشان يبقى مع ابنه فالطفل بيقدر ده جدا
٥. حددي وقت للقراءة مع الطفل وحددي كمان مكان مريح للقراءة
٦. للأطفال اللي كبروا شوية ومابيحبوش يقروا:
ممكن نجبلهم مجلات سهلة القراءة زي ميكي مثلا
انا شخصيا كنت بقرأ ميكي وانا في الجامعة 
٧. كوني قدوة:
لازم الطفل يشوفك بتقرأي مش ماسكة الموبايل طول الوقت. وحتى لو بتقرأي في الموبايل فهميه كده، قوليله انا بقرأ كتاب في الموبايل مش بلعب.
٨. قللي الشاشات في البيت قدر الامكان:
طبيعي ان التلفزيون والموبايل هياخدوا الطفل من الكتاب، خصوصا الاطفال اللي لسه بيتعلموا القراءة. اتفقوا معاهم ان وقت الشاشة يبقى بعد وقت القراءة اللي هتقضوه مع بعض وتتبسطوا. الطفل هيحب يقضي وقت مع مامته اكتر من الفرجه على التلفزيون